ريموتك في ايد مين | سامح حسين #قطايف

رمضان 2025
#قطايف
الحلقة السابعة
ريموتك في ايد مين ؟
في أي بيت أو سكن طلبة ، أو أي مكان بيعيش فيه أكتر من شخص ، لو انت لسه داخل المكان دا لأول مرة وعايز تعرف مين كبير القعدة دي ، أو مين اللي مسيطر في المكان دا ، متتعبش نفسك كتير وتقعد تدور وتفكر ، هو فيه اختبار واحد صغير أوي هتعرف منه مين أكتر حد مسيطر في المكان دا ، الاختبار دا اسمه اختبار الريموت .. اللي معاه ريموت التليفزيون هو أكتر حد مسيطر في البيت ، واللي عنده أطفال من حضراتكم هيفهم كلامي دا كويس أوي ، الأطفال هم اللي في الغالب معاهم الريموت ، وكلنا بنتفرج معاهم على كرتون إجباري ، دا انا أنثى السنجاب خدت مني راقات ..
أصل هي برضو ظاهرة غريبة شوية ، يعني إيه حد بيخليك تتفرج على حاجات مالكش فيها علشان هو عايز يشوفها ، يعني يخليكي تشوفي ماتشات كورة وانتي مش عايزة ، أو انتي تخليه يشوف مسلسلات تركي وهو مش عايز ، ما هي حاجة من الاتنين ، يا اللي في ايده الريموت شخصيته قوية أوي ، يا انت بتحبه أوي ، وفي الحالتين هو هيكون ليه تأثير على أفكارك ، عشان انت ذوقك مع الوقت هيتغير وهيبدأ يتقبل الحاجات اللي بتتفرج عليها .. اللي فات دا كان مقدمة لموضوع الحلقة ..
فخلينا نقفل الصفحة دي هنا ونتكلم في موضوع تاني .
انت متفق معايه إن كل مجال ليه نجومه ؟
يعني مش هنعرف نتكلم عن التمثيل من غير ما نجيب سيرة أحمد زكى .
مفيش حد مهتم بالكورة أو حتى كل معلوماته عنها انها مدورة ميعرفش محمد صلاح .
كلمة مطرب لو مجابتش في دماغك عبد الحليم حافظ هتجيب مين ؟
الشيء الذي يدعو للتأمل بقى ان كل الأسامي دي مطلعتش من الفراغ كدا ، دول أكيد طلعوا وسط ناس كتير .
يعني محمد صلاح وهو رايح التمرين بتاعه في المقاولين ، وبيشتري علبة الكشري ام ٢ جنيه اللي بيملاها شطة ودقة عشان يزود الكمية ويشبع ، أكيد مكانش لوحده ، كان معاه زمايل كتير ، فيه منهم اللي في نفس ظروفه وفيه اللي أحسن منه .
أحمد زكى وهو بيتنطط بين مسرح المعهد ومسارح الدولة عشان مخرج يشوفه ويديله فرصة كان ليه زمايل تانيين بيطاردوا الفرصة زيه .
عبد الحليم حافظ مش الشاب الوحيد اللي جه من الشرقية للقاهرة عشان يغني .
كل واحد من دول وغيرهم كان عنده مشوار طويل أوي ، قابل فيه اللي أحبطه واللي اتريق عليه واللي قاله يعني انت هتبقى ايه يا اخويا ؟!!
لا أستبعد ان محمد صلاح مثلا في يوم من الأيام حد اتريق عليه وقاله انت فاكر نفسك هتبقى رونالدينهو
ممكن ميكونش قاله رونالدينهو بالتحديد يعني ، يمكن قاله مارادونا وللا بيكيه لكن الأكيد انه سمع جملة من العينة دي . لكن خلينا متفقين ان ابو صلاح حقق نجاحات كلنا فخورين بيها دلوقتي ، وبقى بينافس كل عظماء اللعبة دي في التاريخ مش اللي موجودين دلوقتي بس ..
كل شخص ناجح عنده مشهد متكرر في حياته وقف فيه مع نفسه مليون مرة وفكر يبطل ويشوفله حاجة مفيدة يعملها .
كل واحد في الأسامي اللي ذكرتها وراه قصة طويلة منعرفش منها غير آخر لقطة ، ووراه ناس كتير كانوا ماشيين معاه أو ماشيين قدامه ، سبقهم كلهم .. ومنهم اللي اتنسى ومنهم اللي محدش عرفه أصلا . ومنهم اللي رجع من أول الطريق
هل الموهبة لوحدها اللي فرقتهم عن بعض ؟
هل أحمد زكى ومحمد صلاح وحليم هم أكتر ناس موهوبين في جيلهم والأجيال اللي بعدهم واللي قبلهم ؟
طب هل الجهد والتعب بس ؟ هل مفيش حد تعب أكتر منهم وموصلش لحاجة ؟
شوف .. انا مؤمن دايما ان المحرك الأول لكل شيء بيتحرك في الكون هو إرادة الله ، ربنا عايز دا يحصل فبيحصل ، لكن هل إرادة ربنا تعفينا من المسؤولية ؟ مكانش بقى فيه جنة ونار .
السؤال بطريقة تانية ؟
هل لو قدرت توفر نفس الظروف بالظبط لمجموعة من البشر ، هيوصلوا لنفس النتايج ؟
الإجابة لأ طبعا .. طب ليه مع إن الظروف تطابقت ؟ أقولك عشان العقليات اختلفت .
مفيش مثال أوضح للتطابق البشري أكتر من التوائم ، اتنين اخوات عاشوا مع بعض في نفس الوقت جوا بطن نفس الأم ، اتولدوا في نفس اليوم واخدوا نفس الشكل ، وفي أحيان كتير نشأوا في نفس الظروف ، ومع ذلك هل كل توائم العالم تشابهت مصائرهم زي ما تشابهت ملامحهم ؟ الإجابة برضو لأ .. علشان العقلية . والدليل " فطين و ميشو "
كل إنسان من وقت ما بيدخل الحياة لحد ما يخرج منها بيمر بسلسلة من الصراعات ، لكن دايما صراعه الرئيسي مع عقله ، مع أفكاره .
فيه واحد بيتحدف بطوبة يرجع عن طريقه ، وواحد تاني بيتحدف بألف طوبة ، يجمعهم ويبني بيهم برج عالي يقف جواه فوق كل اللي حدفوه بالطوب .
دماغك هي اللي بتحركك ، علشان كدا مينفعش تسيب الريموت بتاعها في إيد حد غيرك .
لو انت إنسان حظك حلو هتقابل كل يوم عدو جديد .
لكن لو انت إنسان سيء الحظ هتواجه كل يوم ١٠ أفكار بس قادرين ينسفوك من جواك .
انت لازم تتحكم في دماغك كويس أوي ، وتسيطر على أفكارك بإيد من حديد قبل ما تحاول تبدأ في أي حاجة .
لازم تراجع باستمرار كل تصوراتك القديمة .
هل معلوماتك عن نفسك صح ؟
هل فكرتك عن قدراتك مظبوطة ؟
هل رؤيتك للحدود والحواجز اللي قدامك رؤية حقيقية وللا مضللة ؟
هل دماغك بتشتغل معاك وللا ضدك ؟
ودا السؤال الأهم . وكل سنه وانتم طيبين ..