تشتغل مندوب مبيعات | سامح حسين #قطايف

رمضان 2025
#قطايف
الحلقة السابعة
تشتغل مندوب ؟
زمان واحنا عيال صغيرة ، كان فيه نوع معين من الضيوف نحبهم ونفرح أوي لما يبعتونا نجيبلهم حاجة .
عمك السخي ، الكريم ، أبو إيد فرطة ، اللي يديك عشرة جنيه تشتريله حاجة ويقولك خد الباقي عشانك .
الشخص دا كانوا أطفال البيت بيميزوه بسرعة وبيتسابقوا مع بعض عاللي هتجيله الفرصة ويروح يجيبله الطلب اللي هو عايزه .
لو بدأت تتعامل مع فلسفة الصدقة بنفس الطريقة تبقى حطيت إيدك على وظيفة أرباحها خيالية ، ركز معايه في الكلام اللي جاي بقى عشان هنتكلم في فلوس .. أيوه سيب اللي في إيدك وبصلي هنا ..
لما تسمع أو تقرا أو يجيلك خبر بأي طريقة من الطرق ان فيه حالة معينة محتاجة مبلغ معين ، لازم تتعامل مع دا على إنه أوردر جايلك من ربنا ، خليك ناصح واخطفه انت بدل ما يروح لغيرك .
إنت مبتديش حد حاجة من جيبك ، ثق في دا تمامًا ، الفلوس فلوس ربنا ، وهو بيك أو من غيرك هيوصلها لصاحبها ، هو بس عشان بيحبك بعتك انت بيهم ، تكريمًا ليك ، وعشان يحليلك بؤك .
بلاش تشغل دماغك علشان خاطرى وتقول هو انا حيلتي حاجة ، دا مرتبي بيكفيني بالعافية .
عشان يا حبيبى زي ما ربنا وصلك الفلوس دي ، هو قادر يوصلها لصاحبها عادي ، سواء عن طريق واحد غيرك أنصح منك هيقرا الرسالة ويفهمها ، أو حتى من غير وسيط خالص .
ربنا بيرزق من غير سبب عادي جدا ، اتشعبط انت بقى في الفرصة وقوله يا رب المشوار دا يلزمني ، عشان محدش مستفيد من القصة دي كلها غيرك .
لا ربنا هياخد حاجة منك ، ولا عباد ربنا اللي هتتصدق عليهم هياخدوا حاجة منك ، انت اللي هتاخد مكسب من غير مقابل .
عشان كدا أسيادنا الكبار اللي كانوا فاهمين الزتونة وعارفين الحكاية دايرة ازاي ، لما كانوا بيدوا صدقة لحد كانوا بيبوسوا إيده ، عشان عارفين انه هو اللي صاحب فضل عليهم .
لو انت بقى اعتبرت نفسك مندوب توصيل ، بتوصل أمانات ربنا لعباده وتاخد مكافئتك ، قابل الخير اللي هتشوفه ، صدقني والله العظيم أحسن وظيفة مضمونة وأمان ومربحة فوق ما تتخيل .
وهنروح بعيد ليه ، انت عندك كام صاحب في دايرتك ؟ 10 ؟ 20 ؟
تعرف النهارده تلف عليهم كلهم وتسألهم كام مرة في حياتهم حصل معاهم انهم طلّعوا صدقة لوجه الله من هنا ، والخير نزل يرف عليهم بعدها من هنا ؟
هتلاقي اللي يقولك كان عندي مشكلة مستعصية ، اتحلت من عند ربنا بعد ما اتصدقت ..
واللي يقولك كنت مديون وسددت ، واللي يقولك بنتي كانت عيانة وربنا شفاها ، المشاكل اللي هتسمعها كتير ، بس الحل كان واحد ، الصدقة .. الناس دي مشاكلها اتحلت لأنها اشتغلت عند ربنا ، وشوف انت بقى لما تشتغل عند ربنا ، مكافآت وحوافز وتأمينات ، وحلول لكل مشاكل حياتك ..
والفرصة قدامك ، وباب التعيين مبيتقفلش ، عايز تشتغل مع ربنا بالقطعة ، كل ما تحصلك مشكلة وللا تحتاج منه طلب ، تقوم تطلع صدقة ، هو كريم ومش هيكسفك ..
عايز تبقى ناصح وتشتغل معاه على طول ، وانت معاك أو مش معاك ، هتكسب أكتر بكتير ..
من مزايا الاستثمار في النوع ده إنه دايمًا كسبان ، عشان صاحب الاستثمار هو اللي عايزك تكسب ، فاتحلك أبواب المكسب على البحري ، يعني مش لازم تتصدق بفلوس خالص .. ممكن عندك معلومة متكتمهاش عن حد وخلي غيرك يستفيد منها ، دي صدقة ..
لو حد قصدك في خدمة وانت تقدر تعملها اعملها وهتتحسبلك صدقة ..
ممكن تتصدق بوقتك لما تروح تسأل عن واحد مريض ، أو تواسي واحد عنده مشكلة .. وممكن تتصدق بكلامك الحلو لو شوفت حد بيقدم محتوى هادف أو عامل مشروع على قده ودخلت كتبتله كلمتين حلوين يدعموه ويساعدوا في نجاحه
يا أخي دا حتى البسمة في وش الناس صدقة ، هو فيه سهولة أكتر من كدا ؟
هترجع في الآخر تحسبها هتلاقي ان الانسان اللي أسعدته أو اللي اديته قرشين أو اللي ساعدته بمعلومة ، ربنا هو اللي بعتله الخير دا ، وكنت انت المندوب اللي وصلّه الخير ، تفتكر اللي يشتغل مندوب عند ربنا ممكن يكسب قد إيه ؟ فكر فيها انت براحتك .. وكل سنة وانتم طيبين ..